В качестве уважения к творчеству Ольги Осиповой и культуре Чувашии мы публикуем этот текст на чувашском языке. Особая благодарность сотрудникам МинКультуры Чувашии за помощь в переводе текста музыкального обозревателя “Musics.News”
Çурхи сивĕ каç, пĕчĕк чăваш ялĕнче, радиоран пĕр юрă янăраса кайрĕ. Çав самантран пуçласа, чун хумханса кайрĕ — “Шăпчăксем” юрă пин-пин чĕре витĕр кĕрсе вырнаçрĕ. Унăн сасси — çепĕç çил пек, чечек пылĕ пек, анчах çав вăхăтрах вăл вут-хĕм пек çунать, асаттесен хăюллăхĕпе тулли. Çав сасӑпа юрлакан хĕр — Ольга Осипова, чăваш халăх юррисен чун кĕввине упрама пултаракан, асамлă сасă хуçи.
Çул çинче тăракан Т-34 танк умĕнче, аслă вăрçă салтакĕн тумтирĕпе тăракан хĕр — Ольга. Унăн куçĕсем малалла, пуласлăхалла пăхаççĕ. Çапла пăхнă пулĕ вĕт пирĕн асаннесем те, тăшмана хирĕç тухнă чух. Паянхи куна мĕнле майпа унăн сăнарĕнче вăрçă вăхăтĕнчи чăваш хĕрарăмĕсен хăватлă сăнĕ курăнать-ши? Ку — Ольга Осиповӑн паха пултарулăхĕн вăрттăнлăхĕ.
Кунта эпĕ асăнса хăвармалла: Ольга — виçĕ ача амăшĕ. Колледжра вĕрентекен. Халăх юрăçи. Тĕнчипе паллă пулнă чăваш кĕввисен хÿтĕлевçи. Пĕр çыннăн чун хушнипе тунă ĕçĕ çакăн пек анлă та тĕрлĕ пулма пултарать иккен!
“Шăпчăксем” — çак юрă çинчен мĕн калама пулать? Çĕршывăн асаплă историне, халăхăн хăватлă чунне кĕске кĕвĕре палăртса хăварма пултарнă. Кашни сыпăкра — чăваш тымарĕн вăйĕ, кашни сăмахра — ватăсен ăс-хакăлĕ. Тем пекех ватăлнă çынсем куççуль тăкаççĕ ăна итленĕ май, çамрăксем вара — хăйсен юнашар мухтавлă историйӗ пуррине туяççĕ.
Пĕррехинче пĕр ватă çын каланăччĕ: “Чĕлхене упрасшăн пулсан— юрлаттарăр ăна; культурăна упрасшăн пулсан — чун пар ăна”. Ольга Осипова çав шухăшăн чĕрĕ тĕслĕхĕ пулса тăрать. Унăн кашни юрри — чăваш чĕлхин çĕнĕ сывлăшĕ, кашни концерчĕ — халăх культурин çĕнĕрен çуралнă пайĕ.
Ольга Осипова сассине итленĕ май, эпĕ шухăша путатăп: мĕн тери телейлĕ çак халăх, мĕн тери телейлĕ çак çĕршыв — унăн культурин çакăн пек хастар та хăватлă хÿтĕлевçисем пур.
“Шăпчăксем” юрланă чух кайăксем те шăпланаççĕ тет юмахра. Ольга юрланă чух вара — чăваш чунĕ вылять, чăваш чĕри тапать.
Тепĕр çĕр çул иртсен те, кам пĕлет, тен, çавăн пекех ларĕç çынсем тĕлĕнсе, саспаллисене вуласа: “Пĕр хĕрарăм пулнă иккен, Ольга Осипова ятлă, вăл чăваш юррине упранă, вăл халăх чунне упранă…” Вăл вара паян та пирĕнпе пĕрле, халăх сассипе юрă шăрантарать, чăваш культурипе мухтанса пурăнать.
Халăха юратакан чун, халăх юрăçи — çакă вăл Ольга Осипова. Унăн тымарĕсем — чăваш çĕрĕнче, унăн сасси — пĕтĕм тĕнчере!
